افترقنا .. وكل واحد في طريق
افترقنا .. واندمل جرحٍ عميق
جرح في قلبي خطير .. ما هقيته يندمل
ما هقيت حبي الكبير .. ينتهي بليا أمل
لكن الواقع يقول .. حبنا ماله فصول
عام عيا يكتمل ..
للأسف فينا انصدمنا .. وبمشاعرنا احترقنا
افترقنا
كانت اللحظة سعيدة .. انتهت حزن وأسى
والأحاسيس العنيدة .. أجبرت قلبك قسى
وآنا في قسوة عنادك .. بين قربك وابتعادك
كنت عاشق ما نسى
وفجأة في لحظة حزينة .. فارق الخاطر حنينه
اختفت نبضات قلبي
اختفى طيفك في دربي
صرت أدور عنك وينك..؟
ما لقيتك .. ما لقيتك
للأسف وانتي بقربي ..!!
أكتشفت الحين قربك .. ماله في الإحساس معنى
اكتشفت إنا في هوانا .. يا هوى عمري انصدمنا
وبمشاعرنا احترقنا
افترقنا
تاهت الخطوة .. وضاع الإختيار
دنيا ما تسوى .. ولا فيها مسار
غير كذبة .. اسمها صدق ووفا
دنيا لعبة .. وكلنا منها اكتفا
بلا عتاب ولا ملام .. انتهى كل الكلام
لا بيدي ولا بيدك .. أجبرك توفين وعدك
في زمن ماله وفا ..
في ثوانيه احترقنا ..
افترقنا
ليست هناك تعليقات:
إرسال تعليق